.png){kind=small}
K P Beena
സായാഹ്നം
ചേര്‍ത്ത് നിര്‍ത്താം നമുക്കമ്മയെ
ചേര്‍ത്ത് നിര്‍ത്താം നമുക്കച്ഛനെ
മുത്തശ്ശിയെയും മുത്തശ്ശനെയും
രക്ഷിതാവായ് നമ്മെ ചേര്‍ന്ന് നിന്നോരെയും
തണലാവാം കുളിരാവാം
ഒരു നല്ല വാക്കാകാം
ഒന്നുമേകാന്‍ കഴിഞ്ഞില്ലയെങ്കിലും
മനം കുളിര്‍ക്കുമൊരു ചെറുപുഞ്ചിരിയേകാ
മവര്‍ തന്‍ മനം തളിര്‍ക്കും
നാളെയാവാനിനി
നാഴികകള്‍ മാത്രം
നമ്മളും പിന്നെ വയോജനമാവും
ഒരു കരസ്പര്‍ശം കൊതിക്കും
ഒരു തലോടല്‍ കാത്ത് നില്‍ക്കും
കിതപ്പോടെ പാഞ്ഞ
ഘടികാര സൂചി
നിശ്ചലമായെന്ന് തോന്നും
അറിയാതെ നമ്മള്‍ തിരിഞ്ഞ് നോക്കുന്നേരം
കണ്‍പാര്‍ത്ത് കണ്‍പാര്‍ത്ത്
കണ്ണീര്‍ പൊഴിച്ച
മുഖമൊക്കെ നാമോര്‍ത്തെടുക്കും
ഒരു വേള ഘടികാര സൂചിയൊന്ന്
പിന്തിരിഞ്ഞെങ്കിലെന്നോര്‍ക്കും
ഒന്ന് പിന്തിരിഞ്ഞെങ്കിലെന്നോര്‍ക്കും
വറ്റിവരണ്ട മിഴിക്കോണിലന്നും
ഒരു തുള്ളി കണ്ണീര്‍ പിടയും
വെറുതെ ഒരു തുള്ളി കണ്ണീര്‍ പൊഴിയും
