Dr Suja Susan George

തെമ്മാടിക്കുഴി

കനിവോലും കണ്ണാലവള്‍

അമ്മച്ചിയെ കണ്ടു

തെമ്മാടിക്കുഴിക്കു ചുറ്റും

കണ്ണീരോളങ്ങള്‍ തീര്‍ത്ത്

അവളുടെ അമ്മച്ചി കരഞ്ഞു

"ഇനി നിന്റെ ആത്മാവിനെന്ത് ?"

 

പച്ചനിലമായി പരന്നു കിടപ്പവള്‍

മിന്നാമിന്നികളൊളിക്കും

തടാകമായി തണുത്തവള്‍

നിലാവായി ചിരിച്ചു കുഴഞ്ഞു

 

വെണ്ണക്കല്ലു കുരിശുകള്‍ക്കടിയില്‍

റോസാദലങ്ങള്‍ക്കും ഓര്‍ക്കിഡ്

-പ്പൂക്കള്‍ക്കുമിടയില്‍ കുര്‍ബ്ബാനകളും

കൂദാശകളുമേറ്റു വാങ്ങിയവർ

ദുര്‍ഗന്ധത്താല്‍ മൂക്കുപൊത്തുന്നതും

ഉഷ്ണപ്രവാഹത്താല്‍ എരിപൊരി -

കൊള്ളുന്നതുമിടം കണ്ണാലവള്‍ കണ്ടു

 

പാവം അമ്മച്ചി!

അവളൊന്നുകൂടി കനിവൂറി

ഇലഞ്ഞിപ്പൂവിന്‍ മണമുള്ള

ചുണ്ടുകളാൽ അവൾ

അമ്മച്ചിയുടെ കണ്ണീര്‍ക്കണങ്ങള്‍

ഉമ്മ വെച്ചുണക്കി .